Patios vivos
Desde a EEI Deán Grande enténdese o patio como un lugar de encontro, socialización e aprendizaxe. Os patios vivos incorporan a natureza e os seus elementos como ferramentas de xogo, achegando a natureza á escola.
Os patios vivos favorecen nas crianzas a súa autonomía, a toma de decisións, as relacións igualitarias de xénero, a creatividade, a liberdade, a confianza, as relacións positivas e tranquilas, o xogo non estruturado e a xestión de risco. Contribúen tamén a que as nenas e nenos xoguen, aprendan, creen, inventen, descubran, respecten, coiden e observen.
Proposta
A proposta consistiu nunha remodelación completa do patio do centro cara un modelo de patio vivo, desenvolvendo unha nova proposta de distribución e zonificación con diferentes ambientes de aula no exterior.
- Espazo relax: para descansar, leer, conversar...
- Espazo de xogo simbólico e imitación: para inventar e reproducir situacións fantásticas ou cotiás.
- Espazo terra: para construír, escavar, manipular...
- Espazo de creación: para construír e crear libremente con material non estruturado.
- Espazo dos sentidos: para potenciar a estimulación sensorial.
- Espazo da ciencia: para potenciar a curiosidade científica.
- Espazo das artes: para potenciar o desenvolvemento artístico (baile, canto, debuxo...)
- Espazo da asemblea: para favorecer actividades orais en gran grupo (asembleas, conversas, resolución de conflitos, organización de tarefas...)
- Espazo de movemento natural: para potenciar o movemento, a coordinación e o equilibrio.
Con esta remodelación do patio pretendeuse acadar diferentes beneficios para os nenos e nenas:
- Beneficios cognitivos, facilitando o contacto coa natureza no ámbito escolar que mellora o desenvolvemento cognitivo, intelectual e sensorial de nenas e nenos
- Beneficios emocionais, reducindo o número de conflitos. Un patio vivo é un patio rico en elementos e posibilidades de xogo polo que o alumnado aprende a comunicarse, negociar, compartir, cooperar e coordinarse.
- Beneficios físicos, facilitando a actividade física (correr, saltar, agocharse, explorar) que proporciona unha condición máis saudable e favorece a relaxación e a aprendizaxe.
Dentro das accións levadas a cabo cabe salientar as lecturas da bibliografía especializada, a organización de reunións da comunidade educativa para o deseño da proposta, a elaboración conxunta do deseño do patio ,zonificando o espazo en diferentes ambientes de aprendizaxe, e a colaboración coa administración local para acadar recursos e posibilitar a transformación do patio.
