O mar
O proxecto educativo proposto baseouse na riqueza de oportunidades que ofrece o tema do mar, centrándose en tres aspectos chave:
- O mar como elemento cotiá da vida do alumnado do centro.
- O seu potencial para reflexionar sobre a necesidade de coidar o medio ambiente e o planeta.
- Ser un tema do que parten moitos contidos a desenvolver na etapa de Educación Infantil e Primaria (as paisaxes costeiras, as especies mariñas, a pesca, o porto, o respecto ao medio ambiente ou o ciclo da auga).
Partiuse dun proxecto documental integrado no que a biblioteca escolar do centro estivo moi implicada. O programa estaba dividido en tres bloques temáticos segundo as avaliacións da programación docente. Na primeira avaliación, coa actividade Coñecendo o Mar de Vigo, traballáronse contidos relacionados co mar coma paisaxe natural, a súa flora e fauna, oficios asociados e monumentos da cidade de Vigo relacionados co mar. Na segunda avaliación, coa actividade A contaminación mariña, traballáronse contidos relacionados coa contaminación mariña e as consecuencias derivadas. Na terceira avaliación, por medio da actividade Coidamos a nosa terra, estudáronse contidos relacionados coa importancia do coidado do medio ambiente e a reciclaxe.
O produto final foi a creación dun rap e a realización do seu videoclip por parte do alumnado. Cada curso escolar tivo que elaborar unha estrofa para o texto da canción que foi acompañada con música de Paco Nogueiras. Este proxecto permitiu coñecer todas as profesións relacionadas co mundo da música comezando pola composición da letra, a súa adaptación a unha base musical, gravación e edición, masterización e postprodución, coreografía, deseño gráfico de carátulas e portadas e publicación e difusión en diferentes canles.
O proxecto supuxo un traballo interdisciplinar que implicou a todas as titorías e ás diferentes especialidades, xa que desenvolveu contidos propios de Lingua e Literatura Galega e Castelá, Educación Artística, Lingua Estranxeira e Ciencias Sociais. Permitiu tamén poñer en funcionamento procesos educativos que implicaban cooperación, traballo en equipo, organización, responsabilidade e autonomía, delegación de funcións, respecto ou resolución de conflitos.
Letra; Alumnado do CEIP Illas Cíes
Música: Paco Nogueiras
Retrouso infantil
No Illas Cíes imos rapear
esta canción coa que ides a brincar.
Neste cole aprendemos sobre o mar
Todos estamos dispostos a xogar.
1o de Primaria
No Illas Cíes poñemos os pés,
pero hai máis allá que non ves
Dende Redondela vemos San Simón
estelas en Nigrán, fóra Sálvora e Ons.
2o de Primaria
Para na mar salgada poder gozar,
os teus residuos ao lixo irán.
A mar salgada, a mar rizada,
é tan bonita, é tan amada.
3o Primaria
Ao marciño de Vigo, tan tranquiliño,
saen os mariñeiros pescar peixiño.
Barcos e redes saes faenas.
Peixe, peixiño, todos a xantar!
4o Primaria
Ao tomar o sol nas praias de Samil.
Bouzas, Alcabre, Patos e a Fonte,
crema tes que poner para non sufrir.
Preparado estás, a gorra ponte!
5o de Primaria
O mar de Vigo mola mogollón,
sempre que flota no meu corazón.
Vexo todo o mundo doutra cor,
porque a ría de Vigo é a mellor.
6o de Primaria
Vigo, Vigo. Coa túa ría fermosa
dende a praia ata a túa costa.
Mar que acariñas as praias de Vigo,
non te vaias. Quédate comigo!
