O medio
O obxectivo principal do ProxectoTERRA levado a cabo neste centro ao longo dos últimos cursos foi que o alumnado coñecese o espazo no que vive e que desenvolvese a súa capacidade de análise e espíritu crítico sobre o medio no que habita.
A ferramenta documental fundamental para achegarse ao espazo de estudo foi a cartografía. Empregáronse distintos elementos como a folla 1/50.000 do mapa topográfico de Padrón, a fotografía aérea, aplicacións dixitais como Google Earth ou maquetas 3D.
O alumnado estudou o espazo no que vive cun enfoque multidisciplinar. Traballouse sobre o medio físico (xeoloxía, topografía, hidrografía, vexetación) e sobre o medio humano (poboamento, construcións singulares, comunicación, recursos económicos). En cada curso púxose o acento sobre algunha cuestión en particular: a colonización das especies alóctonas, a situación de Padrón coma centro do Corredor Atlántico ou as realidades paisaxísticas da contorna, identificando tres categorías: espazo urbano, rururbano e rural.
- A primeira categoría está representada pola vila histórica de Padrón, cabeceira da comarca, onde se presenta de forma aguda a problemática da destrución do casco histórico e do desenvolvemento urbanístico pouco respectuoso.
- A segunda categoría está representada polo espazo rururbano que se estende ao longo da estrada N-550 e coincide coa fosa tectónica Tui-Carballo.
- A terceira categoría está representada polo espazo rural, modelo de poboamento intercalar, constituído por parroquias con dez ou doce aldeas que se van atopando a medida que nos distanciamos do eixo atlántico.
Accións
A colaboración entre os diferentes departamentos do centro foi continuada, desenvolvéndose conxuntamente numerosas actividades propias das materias específicas: Matemáticas, Ciencias Sociais e Naturais, Xeografía ou Historia da Arte. Decidiuse presentar a seguinte escolma:
- Actividades específicas sobre localización, orientación e sistemas de xeoreferenciación e coordenadas, realizando os cálculos trigonométricos para calcular a latitude do centro ou a distancia e altura de edificios e elementos singulares do relevo da zona.
- Actividades específicas sobre a colonización de especies vexetais alóctonas con explicación sobre a cliserie do Monte San Gregorio-Meda e posterior saída para localizar, identificar e clasificar estas especies.
- Impresión de cartografía na impresora 3D, tanto do relevo da contorna en diversas escalas así como doutras áreas xeográficas de Galicia.
Estas actividades foron sempre acompañadas do emprego dos materiais de Identidade Territorial propostos polo ProxectoTERRA así como de visitas a lugares de interese relacionados coas mesmas; viaxando en diferentes edicións a Guimaraes, Courel ou Porto ou organizando visitas propias por parte do centro como a visita a Cabo Ortegal e á Serra da Capelada.
